2018-yilning 8-9-dekabr kunlari Toshkent shahri Yunusobod tumanida joylashgan “Saxovat sport serviz” sport majmuasida yoshlar,oʻsmirlar va kattalar oʻrtasida taekwondo ITF boʻyicha Oʻzbekiston Kubogi musobaqasi boʻlib oʻtdi. Ushbu musobaqada yurtimizning 12 ta viloyatidan 700 dan ortiq sportchilar ishtirok etib, jami 424 medallar jamlanmasi uchun bahslashishdi. Oʻzbekiston Kubogi musobaqasida Xalqaro taekwondo ITF federatsiyasi prezidenti, Butun jahon yakka kurashlar va jang sanʼati IMGC prezidenti professor Ri Yong Son hamda Xalqaro taekwondo ITF federatsiyasi Bosh kotibi Kim Sung Hva ishtirok etishdi.

Xalqaro taekwondo ITF federatsiyasi rahbarlari yurtimizda mazkur sport turining qay darajada rivojlanganligi hamda yurtimizda sport bilan shugʻullanish uchun yaratilgan shart-sharoitlar bilan tanishdilar.

Yuqori martabali mehmonlar uchun Jismoniy tarbiya va sport vazirligi rahbariyati bilan uchrashuv tashkil etilib, yurtimizda 2019-2020-yillarda taekwondo ITF boʻyicha jahon chempionati va jahon kubogi kabi nufuzli musobaqalarni tashkil qilish yuzasidan muzokaralar oʻtkazildi.
Musobaqaning yakuniy natijalarga koʻra umumjamoa hisobida birinchi oʻrinni Toshkent shahri, ikkinchi oʻrinni Buxoro viloyati, uchinchi oʻrinni Toshkent viloyati jamoasi qoʻlga kiritgan boʻlsa, toʻrtinchi oʻrin Samarqand va Sirdaryo viloyati sportchilariga nasib etdi.